मनोरंजनाचं महा'चिंगम'
--------------------
रोहित
शेट्टीला 'चिंगम' (च्युइंगम) हा पदार्थ खूप आवडत असावा. कितीही वेळ चघळत
बसलं, तरी न संपणारा आणि तोंड दुखेपर्यंत सोबत करणारा, शिवाय पाहिजे तेवढा
ताणता येणारा असा हा बहुगुणी पदार्थ आहे. त्याचा सिंघम रिटर्न्स हा नवा
हिंदी सिनेमा म्हणजे मनोरंजनाचं असंच चिंगम आहे. चिंगम आवडणाऱ्यांना ते
आवडेल. चिंगम म्हणताच थूः थूः करणाऱ्यांना ते अर्थातच अजिबात आवडणार नाही.
फर्स्ट थिंग
फर्स्ट. सिंघम हा या दुसऱ्या भागापेक्षा सरस सिनेमा होता. त्यातला सामना
अधिक नेमका, थेट होता. बाजीराव सिंघमची स्टाइल नवी होती. त्याला जयकांत
शिकरेच्या रूपानं तगडा खलनायक लाभला होता. त्यामुळं ती मनोरंजनाची
महागर्जना चांगलीच दुमदुमली होती. सिंघम रिटर्न्समध्ये आता हा सामना मुंबईत
आला आहे. सुमारे १.८४ कोटी मुंबईकरांची प्राणपणाने रक्षण करण्याची
जबाबदारी अवघ्या ४७ हजार पोलिसांवर आहे आणि त्यातले बहुसंख्य सर्वसामान्य
पोलिस अगदी नेकीने हे काम पार पाडत असतात. मात्र, काळ्या पैशांचं राजकारण
करणाऱ्या आणि भोंदू बाबांच्या आश्रमांत हे पैसे लपविणाऱ्या राजकारण्यांमुळं
सामान्यांप्रमाणंच काही चांगले पोलिसही भरडले जात असतात. अशा वेळी डीसीपी
पदावर मुंबईत आलेला बाजीराव सिंघम हे दुष्टचक्र भेदण्याचा प्रयत्न करतो आणि
पोलिसांच्या सहकार्यानं ही कामगिरी पूर्ण करतो.
'सिंघम
रिटर्न्स'चा स्वतंत्र विचार करता तो अगदीच टाकाऊ बनला आहे, असं अजिबात
नाही. पण रोहित शेट्टीनं अगदी ती सुरतची शंभर पदार्थ मिळणारी महाथाळीच सादर
करण्याचा निश्चय केल्याप्रमाणे इतक्या गोष्टी यात कोंबल्या आहेत, की
विचारायची सोय नाही. त्यामुळं याही सिनेमात रोहितची बाळगोपाळांचं मनोरंजन
करणारी ती गाड्यांची हवेतली उडवाउडवी आहे, नायकाची काही जमलेली साहस दृश्ये
आहेत, सुंदर नायिका आहे, तिचा कॉमेडी-कम-प्रेमाचा ट्रॅक आहे, सिंघमचं
शिवगड गाव आहे, आई-बाबा आहेत, सर्वसामान्य पोलिस आणि त्यांच्या कुटुंबांची
परवड आहे, काळा पैसा वापरणारे राजकारणी आहेत, आघाडीचं राजकारण आहे,
चांगला-वाइट मीडिया आहे, दिल्लीचं प्रेशर आहे, दर्गा आहे, चादर आहे... गाणी
आहेत. असं सगळं सगळं आहे. तरीही पहिल्या भागातल्यासारखी नायकाची ती
'स्टीम' जाणवत नाही. याचं कारण या सिनेमाचं झालेलं 'चिंगम'. आधीच खाल्लेलं
च्युइंगम पुन्हा कुणी चघळायला दिलं तर ते जेवढं बेचव वाटेल, तसं काही वेळा
वाटतं. म्हणजे काही काही ट्रॅक एवढे प्रेडिक्टेबल आहेत, की बस्स.
कॉन्स्टेबल महेश जाधवचा (गणेश यादव) थोडासा सस्पेन्स ट्रॅक वगळला, तर या
सिनेमात नवं किंवा वेगळं काहीही नाही. भारतीय लोक पार्टीचे प्रमुख गुरुराज
आचार्य (अनुपम खेर) हे 'सिंघम'चेही गुरुजी असतात. राज्याचे मुख्यमंत्री
अधिकारी (महेश मांजरेकर) हाही सिंघमचा शाळेतला सीनियर मित्र. सत्ताधारी
पक्षाबरोबर आघाडी असलेले नेते प्रकाश राव (झाकीर हुसेन) आणि भोंदू बाबा
सत्यराज चंदर (अमोल गुप्ते) यांच्या काळ्या पैशांच्या जोरावर सुरू असलेल्या
कारवायांना गुरुजींचा विरोध असतो. त्यातून प्रकाश राव आणि बाबा सत्तेतून
बाहेर पडतात आणि त्याच वेळी गुरुजींचीही हत्या होते. राव आणि बाबांच्या
काळ्या पैशांविरोधात पुरावा गोळा करण्याची जबाबदारी सिंघमवर येते. त्याच
वेळी त्याचा विश्वासू कॉन्स्टेबल महेश जाधव एका रुग्णवाहिकेतून दहा कोटी
रुपयांचा काळा पैसा नेताना मृतावस्थेत आढळतो. सर्व बाजूंनी अडचणीत
सापडलेल्या सिंघमला आता कसंही करून राव आणि बाबांपर्यंत पोचायचं असतं.
त्यासाठी मग एका प्रसंगातून त्याची सटकावी लागते. तशी ती सटकते आणि मग
उत्तरार्धात संपूर्ण सिंघम स्टाइल हाणामाऱ्या होऊन, शेवटी हजारो पोलिस
रस्त्यावर (बनियनवर) उतरतात. मग सिंघम खलनायकांना आपल्या पद्धतीनं धडा
शिकवतो.
अजयनं
नेहमीच्या पद्धतीनं जोरदार सिंघम सादर करण्याचा प्रयत्न केला आहे. पण
पहिल्या भागापेक्षा तो यात कमी प्रभावी वाटला, हे नक्की. तरीही त्याचे दोनच
अॅक्शन सिक्वेन्स त्याच्या चाहत्यांसाठी पैसा वसूल करणारे ठरतील. करिनानं
मराठीतून शिवीगाळ करणारी आणि सदैव खाण्याच्या शोधात असलेली अवनी धमाल
साकारली आहे. अमोल गुप्तेनं यातला भोंदूबाबा चांगला केला असला, तरी जयकांत
शिकरेची सर आली नाही. तीच गोष्ट झाकीर हुसेनची. बाकी महेश मांजरेकर, समीर
धर्माधिकारी, जितेंद्र जोशी, सोनाली कुलकर्णी (ज्यु.), स्मिता तांबे,
अश्विनी काळसेकर, गणेश यादव, छाया कदम, मेघना वैद्य आदी मराठी कलाकारांची
यात फौजच आहे आणि त्या सर्वांनी चांगलं काम केलं आहे, हे खरं तर वेगळं
सांगायला नकोच. त्यातही एकाच दृश्यात छाया कदम यांनी कमाल केली आहे.
जितेंद्र आणि सोनाली यांचा अजय-करिनासोबतचा एक छोटासाच कॉमेडी ट्रॅक जमला
आहे. इन्स्पेक्टर दया (दयानंद शेट्टी) अनेकदा टाळ्या घेतो.
शेवटी 'आता
माझी सटकली' या गाण्याविषयी. यो यो हनीसिंगच्या या गाण्यानं सध्या सगळीकडं
धुमाकूळ घातला आहे. सिनेमात चांगली गोष्ट एवढीच, की हे गाणं एंड स्क्रोलला
येतं. तेव्हा ज्यांना ते आवडत नाही, त्यांना थिएटर सोडण्याचा मार्ग मोकळा
आहे. अन्यथा उगाच मला राग येतोय असं ओरडायची वेळ यायची. बाकी काही असलं,
तरी हे गाणं खूप वेळा ऐकल्यानंतर तुम्हाला आवडायला लागतं. चिंगमसारखंच!
'सिंघम रिटर्न्स'ही अगदी तस्साच आहे... मोठ्ठ्या 'महाचिंगम'सारखा... तर
चघळत बसा; नाही तर फेकून द्या!
---
निर्मिती - रिलायन्स एंटरटेन्मेंट, अजय देवगण, रोहित शेट्टी
दिग्दर्शक - रोहित शेट्टी
संगीत - जित गांगुली, यो यो हनीसिंग, अंकित तिवारी, मिट ब्रो अंजान
पटकथा - युनूस साजावाल
संवाद - साजिद-फरहाद
पार्श्वसंगीत - अमर मोहिले
भूमिका - अजय
देवगण, करिना कपूर-खान, अनुपम खेर, अमोल गुप्ते, झाकीर हुसेन, दयानंद
शेट्टी, शरद सक्सेना, महेश मांजरेकर, स्मिता तांबे, गणेश यादव, अश्विनी
काळसेकर, समीर धर्माधिकारी, जितेंद्र जोशी, सोनाली कुलकर्णी, मेघना वैद्य,
छाया कदम.
दर्जा - ***
---
(पूर्वप्रसिद्धी - महाराष्ट्र टाइम्स, १६ ऑगस्ट २०१४ - मुंबई आवृत्ती, १७ ऑगस्ट - पुणे)
---
---------------------------------------------------------------------------------------
No comments:
Post a Comment